Gjykata Themelore në Prishtinë – Departamenti Special ka caktuar seancat e shqyrtimit gjyqësor kundër të akuzuarit Grujica Veljoviq, i cili akuzohet për krime lufte kundër popullsisë civile gjatë konfliktit në Kosovë. Aktakuza është ngritur nga Prokuroria Speciale e Republikës së Kosovës dhe përfshin veprën penale të krimeve kundër njerëzimit sipas Kodit Penal të Kosovës dhe ligjit penal të ish Jugosllavisë. Gjykimi do të zhvillohet në mungesë të të akuzuarit, pasi Veljoviq është i paarritshëm për organet e drejtësisë. Përmes një thirrjeje publike, gjykata i kërkon atij të paraqitet dhe të dorëzohet, ndërsa u bën apel qytetarëve që të kenë informacione për vendndodhjen e tij t’i raportojnë autoriteteve. Seancat do të mbahen më 29 dhe 30 prill 2026 në Pallatin e Drejtësisë në Hajvali, duke filluar nga ora 09:30.