Në seancën e fundit të gjykimit për vrasjen në Dragodan, Gjykata Themelore në Prishtinë vendosi që të bëhet ekzaminimi i rrobave që viktima R.T. kishte veshur në momentin e ngjarjes. Ky ekzaminim do të kërkojë analizën për grimca të barotit, me qëllim të përcaktimit të distancës së saktë të qitjes me armë zjarri nga i akuzuari Avni Mustafa, i cili akuzohet për vrasjen dhe armëmbajtje pa leje. Mbrojtësi i Avni Mustafës propozoi këtë ekzaminim, ndërsa prokurorja Fatmire Cacaj kundërshtoi, por propozimi u miratua nga kryetari i trupit gjykues, Gent Beka. Gjithashtu, në seancë ishte paraparë dëgjimi i ekspertes së psikiatrisë Blerina Hoxha, e cila nuk mundi të marrë pjesë për shkak të angazhimeve të tjera. Në aktakuzë përshkruhet se ngjarja ndodhi më 19 mars 2023, kur pas një konflikti pronësor, Avni Mustafa qëlloi me revole në gjoks viktimën R.T., duke i shkaktuar vdekjen. Në këtë rast janë të akuzuar edhe Mustafë Mustafa për pjesëmarrje në rrahje dhe armëmbajtje pa leje, si dhe Leutrim Mustafa për manipulim me prova.