Në Gjykatën Themelore në Prishtinë është mbyllur për publikun seanca e gjykimit ndaj Skender Krasniqit, i akuzuar për vrasjen e F.Z. në gusht të vitit 2024 në Zllakuqan të Lipjanit. Seanca u zhvillua e mbyllur për shkak të dëshmive të dëshmitarëve të mitur, ndërsa i akuzuari ka mohuar fajësinë e tij që në fillim të procesit. Sipas aktakuzës, ngjarja ka ndodhur pas një mosmarrëveshjeje mes fëmijëve të të akuzuarit dhe familjes tjetër, ku më pas Krasniqi ka goditur dy herë F.Z. me thikë, duke i shkaktuar vdekjen. Gjithashtu, ai akuzohet për mbajtje të paautorizuar të armëve, pasi gjatë kontrollit janë gjetur dhe sekuestruar disa thika në pronësi të tij.