Në gjykimin ndaj ish-kryeshefit ekzekutiv të Korporatës Energjetike të Kosovës, Nagip Krasniqi, dëshmitari Mustaf Kavaja deklaroi se aktiviteti i prokurimit për të cilin po zhvillohet procesi ishte realizuar me procedurë të negociuar pa publikim dhe përfundoi me nënshkrimin e kontratës nga të dy palët. Ai sqaroi se detyrat në Zyrën e Prokurimit i kishte marrë nga drejtori Ymer Dragusha dhe se operatori ekonomik ishte përcaktuar nga ky i fundit, ndërsa për aktivitetin ishte marrë edhe një opinion nga KRRPP. Krasniqi akuzohet për keqpërdorim të pozitës zyrtare dhe zbulim të fshehtësisë zyrtare, ndërsa bashkëakuzuar janë edhe Ymer Dragusha dhe Isuf Zejna, për dëmtim të buxhetit të shtetit me rreth 37 milionë euro. Në seancat e mëparshme, Krasniqi dhe Zejna janë deklaruar të pafajshëm, ndërsa Dragusha ka pranuar fajësinë pas marrëveshjes me Prokurorinë Speciale të Republikës së Kosovës.