Gjyqtari kosovar Genc Nuza u përfshi në një valë akuzash dhe kritika pas ndeshjes finale të Kupës së Kosovës mes Ferizajit dhe Dukagjinit, ku u pretendua se gabimet e tij ndikuan në rezultatin përfundimtar. Futbollistët, presidenti i Ferizajit dhe tifozët e akuzuan për gabime të qëllimshme, duke krijuar një atmosferë tensioni dhe polemikash. Përballë këtyre sulmeve, Nuza ka reaguar duke dorëzuar një kërkesë pranë Ministrisë së Kulturës, Rinisë dhe Sportit dhe Këshillit Kombëtar për Parandalimin dhe Sanksionimin e Dhunës në Ngjarjet Sportive, duke kërkuar mbrojtje nga linçimet dhe gjuhët denigruese që kanë ndikuar në integritetin e tij dhe familjes. Ai gjithashtu paralajmëroi se do të parashtrojë padi në gjykatë ndaj atyre që e kanë sulmuar publikisht.