Avokati i familjes së Afrim Bunjakut, heroit të vrarë në sulmin në Banjskë, Arianit Koci, ka deklaruar se vendimi i gjykatës për të akuzuarit përbën vetëm “gjysmë drejtësi”. Ai thekson se duhet që para drejtësisë të dalin edhe organizatorët e sulmit terrorist, të cilët aktualisht janë të paarritshëm për sistemin e drejtësisë. Koci shprehet i kënaqur me dënimet e dhëna ndaj të akuzuarve, duke theksuar se familja e Bunjakut ka pritur këtë vendim, por dhimbja për humbjen e Afrimit mbetet e pazëvendësueshme.