Policia e Tiranës finalizoi operacionin "Picalla", duke goditur një bazë të dyshuar armatimi në fshatin Picallë, që shërbente për furnizimin e grupeve kriminale. Gjatë kontrollit në banesën e shtetasit O. Q., u sekuestruan 9 armë zjarri, përfshirë 5 automatikë, 1 pushkë, 3 pistoleta, një armë gjahu, silenciator, bajonetë, uniforma dhe pajisje të ngjashme me ato të Policisë, si dhe rreth 900 fishekë luftarakë, fitila zjarrpërcjellës dhe kapsolla detonatore. Në kuadër të operacionit u arrestua në flagrancë shtetasja M. H., 66 vjeçe, ndërsa i biri, O. Q., 41 vjeç, u shpall në kërkim. Armët e sekuestruara do të dërgohen në Institutin e Policisë Shkencore për ekspertizë, me qëllim verifikimin e përdorimit të tyre në ngjarje kriminale. Hetimet dhe puna intensive për kapjen e personit në arrati dhe dokumentimin e plotë të veprimtarisë kriminale vazhdojnë, ndërsa materialet iu referuan Prokurorisë së Tiranës për veprime të mëtejshme.