Policia italiane ka goditur një bazë të dyshuar të një organizate kriminale shqiptare në Prato, ku u sekuestruan pesë pistoleta, municione, dokumente të falsifikuara dhe rreth 30 mijë euro cash. Në apartamentin e kontrolluar jetonin një 43-vjeçar shqiptar me precedentë penalë dhe partnerja e tij rumune, të cilët u arrestuan nga autoritetet. Armët e sekuestruara përfshijnë pistoleta Beretta në kalibra të ndryshëm, një armë e modifikuar pa të dhëna identifikuese, një revolver dhe një pistoletë kopje e një Glock, si dhe një sasi të konsiderueshme municionesh. Hetimet vazhdojnë, ndërsa policia po shqyrton dokumentet e falsifikuara dhe paratë e sekuestruara, që ishin ndarë në kartëmonedha me prerje të ndryshme.