Policia e Tiranës ka finalizuar operacionin "Segmenti", duke arrestuar 14 persona të dyshuar për shpërndarje droge kryesisht pranë shkollave 9-vjeçare dhe të mesme në kryeqytet. Gjatë operacionit janë sekuestruar 220 gramë kokainë, qindra doza cannabis, një armë zjarri, si dhe mjete për organizimin e lojërave të fatit, përfshirë dy tavolina pokeri dhe çipsa. Përveç të arrestuarve, janë shpallur në kërkim edhe 5 persona të tjerë, ndërsa një person u kap në flagrancë me armë zjarri. Hetimet kanë zbuluar se grupi vepronte në bashkëpunim, duke përfshirë edhe aktivitete të tjera të paligjshme, ndërsa materialet i janë dorëzuar Prokurorisë për veprime të mëtejshme.