Policia e Vlorës, në bashkëpunim me Drejtorinë e Përgjithshme të Policisë së Shtetit, zhvilloi operacionin e koduar “Rrjetet” në zonën e Drimadhës, ku arrestoi dy persona të shpallur në kërkim për mashtrim kompjuterik. Të arrestuarit, G. P. dhe Xh. H., dyshohen për përfshirje në skema mashtruese të call center-ave, përmes të cilave janë përfituar shuma të konsiderueshme parash. Gjatë aksionit u arrestua edhe një 28-vjeçar për përkrahje të autorëve të krimit, ndërsa në vilën ku qëndronin janë sekuestruar një armë zjarri dhe lëndë narkotike. Vendimet e gjykatës për masën e sigurisë “Arrest në burg” për dy të shumëkërkuarit ishin marrë në prill të këtij viti, ndërsa operacioni vjen pas hetimeve dhe ndjekjes me metoda proaktive të veprimtarisë kriminale.