Policia e Tiranës ka finalizuar operacionin e koduar “Ilegal chat”, duke goditur një rrjet prostitucioni që funksiononte në një apartament në rrugën “Naim Frashëri”. Gjatë këtij operacioni u arrestuan dy shtetase vietnameze, 51-vjeçarja Th. A. dhe 33-vjeçarja Th. P., të cilat dyshohen se ushtronin veprimtarinë kriminale në ambientet e marrë me qira. Hetimet zbuluan se gratë siguronin klientët përmes komunikimeve në rrjete sociale, ku organizonin edhe takimet. Materialet procedurale janë dorëzuar në Prokurorinë e Tiranës, ndërsa policia vijon punën për të identifikuar dhe ndëshkuar persona të tjerë të përfshirë në këtë rrjet ilegal.