Ish-veprimtari i LDK-së, Halil Geci, është paraqitur dhe intervistuar nga Policia e Kosovës, në njësinë për Krime të Rënda, lidhur me dyshimet për kërcënime ndaj presidentes Vjosa Osmani, të cilat ai i kishte shprehur në një postim në Facebook. Prokuroria Speciale e Republikës së Kosovës ka nisur hetimet për veprën penale “Dhuna ndaj përfaqësuesve të lartë të Republikës së Kosovës” në lidhje me kërcënimet ndaj presidentes Osmani. Pas disa orësh intervistimi, Geci është liruar nga Policia, ndërsa avokati i tij, Gazmend Halilaj, ka cilësuar rastin si të paprecedent dhe ka theksuar se liria e shprehjes së mendimit është e garantuar me Kushtetutën dhe Konventën Europiane. Avokati ka kritikuar përfshirjen e institucioneve të shtetit në trajtimin e postimeve të qytetarëve në rrjetet sociale, duke e konsideruar këtë një shkelje të të drejtave demokratike.