Autoriteti Kombëtar i Ushqimit (AKU) ka zbuluar se helmimi i 56 studentëve në Akademinë e Sigurisë në Sauk u shkaktua nga një kampion makarona të gatshme që përmbante baktere Escherichia coli dhe stafilokok koagulazë pozitiv. Nga nëntë mostrat e analizuar, vetëm njëra rezultoi jokonform me standardet e sigurisë ushqimore, ndërsa tetë të tjera ishin brenda normave. Për shkak të këtyre gjetjeve, AKU ka ndaluar aktivitetin në kuzhinën e Akademisë dhe në subjektin privat SORI-AL në Garnizonin “Skënderbej”, ku prodhoheshin ushqimet, duke vendosur edhe një gjobë prej 1.5 milionë lekësh për shkelje higjieno-sanitare. Përveç ndërprerjes së aktivitetit, subjekti është detyruar të asgjësojë produktet e bllokuara dhe janë marrë masa ligjore ndaj personelit përgjegjës, duke përfshirë arrestimin e kuzhinierit dhe teknologes së ushqimit.