Prokuroria për Ndjekjen Penale të Krimit të Organizuar dhe Korrupsionit ka nisur hetim ndaj një kryetari gjykate dhe një administratori në Gostivar, të cilët dyshohen se kanë kërkuar dhe marrë 8,000 euro për të ndikuar në vendimet gjyqësore. Ata premtonin ndërhyrje te gjyqtarët e Gjykatës Themelore dhe të Apelit për të ndryshuar vendime në një mosmarrëveshje civile, duke kërkuar fillimisht 5,000 euro dhe më pas edhe 3,000 euro shtesë. Gjithashtu, administratori dyshohet se ka marrë 800 euro për përfundimin e dokumentacionit të lidhur me çështjen. Prokuroria ka propozuar masa paraprake për të dy të dyshuarit, duke përfshirë ndalimin e largimit nga vendbanimi dhe sekuestrimin e dokumenteve të udhëtimit, si dhe ndalimin e kryerjes së aktiviteteve të caktuara lidhur me hetimin.