Prokuroria Themelore në Prishtinë dhe Policia e Kosovës kanë nisur hetime lidhur me dyshimet për kurdisje në ndeshjen Llapi – Drita, e cila përfundoi me rezultatin 0:2 në kuadër të Superligës së Kosovës në Futboll. Autoritetet kanë pranuar informata që ngrejnë dyshime për parregullsi dhe po ndërmarrin veprimet e nevojshme hetimore në përputhje me ligjin. Ky hap erdhi pas reagimeve të shumta në opinionin publik dhe qarqet sportive, të cilët kanë kërkuar sqarime për këtë rast. Megjithatë, Prokuroria dhe Policia nuk kanë dhënë detaje të mëtejshme mbi natyrën e informatave apo fazën e hetimeve, duke theksuar se procesi do të vazhdojë në mënyrë ligjore dhe transparente.