Prokuroria Themelore në Prishtinë ka autorizuar Policinë e Kosovës për të ndërmarrë veprime shtesë hetimore lidhur me keqtrajtimin e një fëmije 5-vjeçar në komunën e Lipjanit. Hetimet synojnë të identifikojnë përgjegjësinë eventuale të zyrtarëve të Qendrës për Punë Sociale në Lipjan dhe zyrtarëve të tjerë kompetentë të komunës, të cilët mund të kenë pasur rol direkt apo indirekt në këtë rast. Rasti u bë publik pas arrestimit të dy prindërve të fëmijës, të cilët dyshohen për keqtrajtimin e tij, ndërsa fëmija u dërgua në Qendrën Klinike Universitare të Kosovës me plagë të rënda në të dy shputat e këmbëve dhe dyshohet edhe për kequshqyerje. Prokuroria thekson përkushtimin e saj në ndjekjen e rasteve që lidhen me mbrojtjen e fëmijëve, ndërsa hetimet vazhdojnë për të zbardhur të gjitha rrethanat e ngjarjes.