Një kallëzim penal është dorëzuar në Prokurorinë Themelore Publike në Koçan ndaj tetë inspektorëve të Inspektoratit Shtetëror të Punës, të cilët dyshohen se për vite me radhë nuk kanë kryer kontrolle në objektin hotelierik "Pulse". Nga viti 2022 deri më 16 mars 2025, ata nuk kanë nisur asnjë procedurë inspektimi, pavarësisht detyrimit ligjor dhe faktit që objekti ishte i vetmi i këtij lloji në komunë. Mosveprimi i tyre ka lejuar funksionimin e paligjshëm të "Pulse", duke ekspozuar punonjësit ndaj rreziqeve për sigurinë dhe shëndetin në punë, si dhe duke sjellë përfitime të kundërligjshme në vlerë mbi 1.2 milion denarë. Hetimet vazhdojnë për të përcaktuar përgjegjësinë institucionale lidhur me funksionimin e diskotekës, që është në qendër të vëmendjes pas një zjarri tragjik në këtë objekt.