Ministria e Punëve të Brendshme njoftoi se Sektori i Krimit Kibernetik dhe Forenzikës Dixhitale ka marrë në pyetje 13 persona lidhur me përhapjen e informacionit të rremë për ndotjen e supozuar të ujit të pijshëm në Shkup. Gjatë intervistave, të gjithë deklaruan se kishin publikuar ose ndarë informacionin pasi e kishin parë në rrjetet sociale ose e kishin dëgjuar nga të tjerë, pa pasur një burim të besueshëm që të konfirmonte pretendimet. Policia po vazhdon mbledhjen dhe analizimin e të dhënave për të sqaruar mënyrën se si u përhap ky informacion dhe për të identifikuar të gjitha rrethanat e ngjarjes. Ministria i bën thirrje qytetarëve të mos ndajnë lajme të paverifikuara dhe të marrin informacion vetëm nga burime zyrtare, duke theksuar se përhapja e dezinformatave mund të shkaktojë panik dhe ankth të panevojshëm në publik.