Prokuroria Themelore në Prishtinë ka nisur hetime lidhur me dyshimet për ndotje të ajrit nga oxhaku i Korporatës Energjetike të Kosovës (KEK) në Obiliq. Kjo pas pranimit të informacioneve dhe një video-incizimi që ngritën shqetësime për ndotjen përmes tymit të dalë nga KEK-u. Prokurori i shtetit ka autorizuar Policinë e Kosovës për të ndërmarrë veprimet hetimore dhe për të siguruar provat e nevojshme në kuadër të veprës penale për ndotje, degradim ose shkatërrim të mjedisit sipas Kodit Penal të Kosovës. Prokuroria thekson përkushtimin e saj në mbrojtjen e mjedisit dhe në zbardhjen e plotë të këtij rasti, duke garantuar veprime ligjore të plota.