Byroja Kombëtare e Hetimit ka kryer kontrolle në vilën dhe zyrën e biznesmenit Samir Mane, me urdhër të Gjykatës së Posaçme kundër Korrupsionit dhe Krimit të Organizuar. Gjatë bastisjeve është sekuestruar telefoni celular i tij, në kuadër të një megaoperacioni të SPAK-ut që synon goditjen e grupeve kriminale të përfshira në trafik ndërkombëtar droge dhe pastrim parash. Hetimet përfshijnë disa persona dhe grupe, ndërsa po verifikohen lidhjet e investimeve të dyshuara në projekte ndërtimore në zonën e Palasës me të ardhura nga aktivitetet kriminale. Deri tani, ndaj Samir Manes nuk është ngritur asnjë akuzë, ndërsa ai nuk ka dhënë deklarata të reja për zhvillimet e fundit.