Në korrik 2025 nisi një hetim nga prokuroria e Korçës lidhur me veprimet e ish-drejtorit të burgut Drenovë, Fatjon Fasho, dhe ish-shefit të policisë së burgut, Sokol Kaçoli, për shkak të futjes së vajzave në burg për takime speciale me të dënuar me burgim të përjetshëm. Në qendër të hetimit është modelja kosovare Ziza Pajaziti, e cila më 12 qershor 2025 hyri në burgun e sigurisë së lartë Drenovë për të takuar Laert Haxhiun, të dënuar për vrasje. Prokuroria ka kërkuar prej gati një muaji marrjen në pyetje të Pajazitit, por ajo nuk është gjetur ende nga policia dhe prokuroria. Ndërkohë, është kërkuar informacion nga Ministria e Punëve të Brendshme për adresën e saj në Tiranë, ndërsa deri tani nuk ka persona të pandehur për shpërdorim detyre në lidhje me këtë rast.