Prokuroria për Ndjekjen Penale të Krimit të Organizuar dhe Korrupsionit ka nisur një hetim paraprak që nga dhjetori i vitit të kaluar për dyshime spiunazhi në kabinetin e Presidentes Gordana Siljanovska-Davkova. Hetimi u aktivizua pas një kallëzimi anonim nga një grup punonjësish të Ministrisë së Brendshme, të cilët pretenduan se të dhënat konfidenciale janë kopjuar dhe koduar nga sistemi kompjuterik i kabinetit dhe mund të kenë përfunduar te shërbimet e inteligjencës së huaja. Janë sekuestruar pajisje kompjuterike dhe telefona celularë, ndërsa po kryhet analiza e provave elektronike, por ende nuk ka një raport përfundimtar. Dyshimet rriten edhe për shkak të mungesës së pamjeve nga kamerat e sigurisë në zyrën e presidentes, që nuk janë siguruar ende nga autoritetet.