Influencuesja braziliane Virginia Fonseca, partnerja e futbollistit të Real Madridit, Vinicius Junior, ka njoftuar me dhimbje të madhe vdekjen e truprojës së saj personale, Rogerio Camilo Ramos, dhe bashkëshortes së tij, Paula Regina Rodarte Camilo, pas një aksidenti rrugor në Brazil. Aksidenti ndodhi në një autostradë pranë Goianias, ku Rogerio po udhëtonte me motoçikletë dhe ndërroi jetë në vend, ndërsa bashkëshortja e tij humbi jetën më vonë pas përpjekjeve të emergjencës për ta shpëtuar. Virginia Fonseca shprehu tronditjen e saj të thellë dhe falenderoi truprojën për mbrojtjen dhe dashurinë që i kishte dhënë familjes së saj, duke premtuar se kujtimi i tij do të mbetet gjithmonë në zemrat e tyre. Ajo gjithashtu siguroi se familja do të kujdeset për vajzën e tyre, Heloisa, dhe i dërgoi ngushëllime familjarëve të viktimave në këtë moment të vështirë.