Në Gjykatën Themelore në Mitrovicë, Departamenti për Krime të Rënda, është mbajtur seanca fillestare ndaj Sh.B., i akuzuar për tentativë vrasjeje, mbajtje të paautorizuar të armëve dhe dëmtim të pasurisë. I pandehuri nuk pranoi fajësinë për veprat penale dhe është njoftuar për mundësinë e kundërshtimit të provave brenda 30 ditëve nga data e shqyrtimit. Ngjarja ka ndodhur më 27 nëntor 2025 në Vushtrri, ku Sh.B. dyshohet se ka shtënë me pushkë gjysmë automatike ndaj një familjeje, duke plagosur një 16-vjeçare në shpatullën e majtë, e cila është jashtë rrezikut për jetë. Policia ka konfiskuar dhjetë fishekë dhe ka raportuar dëmtime në një automjet dhe një dritare banese si pasojë e të shtënave, ndërsa masa e paraburgimit ndaj të pandehurit vlen deri më 19 mars 2026.