Në rigjykimin e rastit të vrasjes së ndodhur në dhjetor 2021 në Hajvali, i akuzuari Shkumbin Kryeziu deklaroi se nuk ka kryer vrasjen për të cilën ngarkohet, por se përgjegjësia i takon vëllait të tij të mitur, për të cilin ai është munduar të marrë përgjegjësinë. Mbrojtësi i tij kërkoi lirimin nga akuza, duke u bazuar në dëshmitë dhe ekspertizat e paraqitura, ndërsa prokurori dhe pala e dëmtuar kërkuan dënimin e tij për veprën penale “Vrasje e rëndë” dhe “Mbajtje të paautorizuar të armëve”. Sipas aktakuzës, ngjarja ka ndodhur në rrugën “Tom Lantosh” në Hajvali, ku Kryeziu dhe i mituri A.K. kanë sulmuar me thika tani të ndjerin V.Xh., i cili ka ndërruar jetë si pasojë e plagëve. Gjykata Themelore e Prishtinës e kishte dënuar Kryeziun me 20 vite burgim, por rasti është kthyer në rigjykim për administrimin e provave të reja dhe vlerësimin e ekspertizave të mëtejshme.