Inspektorati Qendror i Mbikëqyrjes së Tregut (IQMT) ka intensifikuar kontrollet në treg me fillimin e pranverës, duke fokusuar inspektimet te produktet e makinerisë, pajisjet personale mbrojtëse dhe lodrat për fëmijë. Si rezultat i këtyre kontrolleve janë sekuestruar dhe larguar nga tregu qindra produkte të pasigurta, për shkak të mungesës së dokumentacionit teknik dhe tejkalimit të afatit të përdorimit. Në listën e produkteve të sekuestruara janë 13 makina shpimi, 5 gërryese këndore, 426 disqe prerëse, 251 jelekë sinjalizues, 114 helmeta pune, 176 maska saldimi, 11 ngjyra dhe mbi 900 lodra për fëmijë. IQMT ka bërë thirrje për respektimin e standardeve ligjore nga operatorët ekonomikë dhe ka ftuar qytetarët të raportojnë çdo rast të dyshuar për produkte të pasigurta në treg, duke theksuar përkushtimin e saj në mbrojtjen e konsumatorëve dhe sigurinë e produkteve.