Inspektorati Qendror i Mbikëqyrjes së Tregut (IQMT) ka filluar një aksion të gjerë për kontrollin e udhërrëfyesve turistikë në Kosovë, duke u fokusuar në personat që ushtrojnë këtë veprimtari pa licencën e nevojshme. Gjatë inspektimeve të zhvilluara në regjionet e Prishtinës, Prizrenit dhe Obiliqit, janë evidentuar edhe udhërrëfyes jo-vendas që operojnë pa autorizim ligjor, duke shkelur kështu ligjin për turizmin. IQMT ka paralajmëruar masa ndëshkuese ndaj operatorëve turistikë dhe individëve që angazhojnë ose ushtrojnë veprimtarinë pa licencë, me gjoba që variojnë nga 3,000 deri në 9,000 euro. Institucioni thekson rëndësinë e angazhimit të udhërrëfyesve vendorë të licencuar për të garantuar informacion të saktë dhe profesional për vizitorët dhe për të mbrojtur trashëgiminë kulturore dhe vlerat turistike të Kosovës.