Gjykata Themelore në Prishtinë ka publikuar aktgjykimin e plotë ndaj ish-ministrit të Industrisë dhe Tregtisë, Endrit Shala, i cili në qershor u dënua me dy vjet burgim për konflikt interesi. Sipas aktgjykimit, Shala ka marrë pjesë me dijeni dhe qëllim në vendimmarrjen që favorizoi biznesin e baxhanakut të tij, duke mos deklaruar lidhjen familjare dhe duke mos u larguar nga procesi. Vendimi i tij ka mundësuar që biznesi i baxhanakut të përfitojë në mënyrë të kundërligjshme rreth 732 mijë euro, duke krijuar një interes financiar të drejtpërdrejtë. Në të njëjtën aktakuzë është përfshirë edhe ish-ministri Vesel Krasniqi, i cili aktualisht është nënkryetar i komunës së Malishevës, por procedura ndaj tij është veçuar për efikasitet.