Ministria e Shëndetësisë së bashku me Qendrën Kombëtare të Transfuzionit të Gjakut kanë nisur aktivitetet për Javën e Dhurimit Vullnetar të Gjakut, një iniciativë që synon të rrisë ndërgjegjësimin mbi rëndësinë jetike të dhurimit të gjakut. Dhurimi vullnetar konsiderohet burimi më i sigurt dhe i qëndrueshëm për furnizimin e institucioneve shëndetësore me gjak dhe produkte të tij, duke ndihmuar në trajtimin e mijëra pacientëve në nevojë. Në këtë javë, dhjetëra nëpunës të Ministrisë së Shëndetësisë, qytetarë dhe punonjës të institucioneve të tjera iu përgjigjën thirrjes për të dhuruar gjak, duke kontribuar drejtpërdrejt në shpëtimin e jetëve. Kjo nismë thekson rëndësinë e solidaritetit dhe angazhimit qytetar për forcimin e sistemit shëndetësor dhe shpëtimin e jetës së shumë njerëzve.