Një 56-vjeçar nga Vorë është arrestuar pasi dyshohet se ka kanosur kushëririn e tij dhe familjarët e tij për t’i marrë 300 mijë euro. Denoncimi erdhi nga vetë viktima, e cila gjeti në portën e banesës së saj një fishek dhe një letër kërcënuese që i kërkonte shumën e madhe të parave. Operacioni policor i koduar “Mesazhi”, i zhvilluar nga specialistët e Komisariatit Nr. 7 dhe Seksionit për Hetimin e Krimeve të Rënda, përfundoi me arrestimin e Ardian Mukës. Gjatë kontrollit në banesën e tij u sekuestruan municion luftarak, veshje të dyshuara si të përdorura në ngjarje dhe një aparat celular, ndërsa hetimet vazhdojnë për zbardhjen e plotë të rrethanave dhe përcaktimin e përgjegjësive penale.