Granit Pepnikaj, i konsideruar si kreu i një rrjeti të sofistikuar mashtrimi financiar përmes Call Center-ave, është arrestuar në Dhërmi nga Policia e Vlorës. Ai ishte fshehur në kompleksin “Olea Residence” dhe ishte shpallur në kërkim për përfitime mbi 50 milionë euro nga qytetarë të Bashkimit Europian. Operacioni u zhvillua pas hetimeve të përbashkëta me autoritetet austriake, të cilat zbuluan një skemë të organizuar që funksiononte si kompani legjitime për pastrim parash dhe mashtrim kompjuterik. Gjykata e Tiranës caktoi masën e sigurisë “arrest me burg” për Pepnikajn, ndërsa autoritetet pritet të japin detaje të mëtejshme mbi hetimet dhe procedurat ligjore.