Policia e Kosovës ndaloi mëngjesin e së premtes gjashtë të rinj serbë në Jarinje, të cilët transportonin materiale me përmbajtje nacionaliste dhe nxitëse të urrejtjes, duke përfshirë simbole të grupit ultra-nacionalist “Delije Sever” dhe portretin e Stefan Nedeljkoviqit, një nga të vrarët në sulmin terrorist në Banjskë. Materialet lidhen me rrjete më të gjera nacionaliste dhe figura si Vladimir Radivojeviqi, i njohur si “Mami”, i përfshirë në sulmin terrorist të vitit 2023 dhe me lidhje me terroristin Millan Radojçiq. Institucionet e sigurisë vlerësojnë se këto aktivitete synojnë destabilizimin e Kosovës dhe fshehjen e përfshirjes së mekanizmave serbë, ndërsa grupi “Delije Sever” ka mbështetje politike deri në nivelet e larta të Beogradit, përfshirë presidentin Aleksandar Vuçiq dhe shërbimin sekret serb BIA. Megjithatë, prokurorja në Mitrovicë urdhëroi lirimin e të rinjve vetëm pak orë pas arrestimit, pavarësisht se ligji parashikon dënime deri në pesë vjet për nxitje të urrejtjes dhe dhunës etnike.