Në pikën kufitare në Merdar është zbuluar një sasi prej rreth 1 milion eurosh të padeklaruara në një automjet, një goditje e rëndësishme kundër lëvizjeve të paligjshme financiare. Drejtori i Doganës së Kosovës, Agron Llugaliu, ka theksuar se ky sukses është rezultat i përkushtimit të stafit, investimeve strategjike në skanerët X-Ray, të cilët janë donacion nga Shtetet e Bashkuara të Amerikës, si dhe bashkëpunimit të ngushtë ndërmjet Doganës dhe Policisë Kufitare në kuadër të Menaxhimit të Integruar të Kufirit. Me urdhër të Prokurorisë Speciale janë arrestuar tre shtetas të huaj për të mundësuar hetimet e mëtejshme lidhur me këtë rast. Llugaliu ka vlerësuar lart profesionalizmin dhe angazhimin e zyrtarëve, duke theksuar se synimi i tyre mbetet garantimi i kufijve të sigurt për vendin.