Në Klinikën për Sëmundje Infektive në Shkup aktualisht janë të hospitalizuar tetë pacientë me formë neuroinvazive të Etheve të Nilit Perëndimor, dy prej të cilëve ndodhen në gjendje të rëndë dhe trajtohen në njësinë e kujdesit intensiv me ventilim mekanik. Drejtori i Klinikës, Fadil Cana, njoftoi se për katër ditë rresht nuk është pranuar asnjë rast i ri i konfirmuar, duke treguar një stabilizim të situatës. Megjithatë, gjatë fundjavës është regjistruar një vdekje e re, e pacientit 70-vjeçar që kishte qenë në gjendje shumë të rëndë që prej 25 gushtit. Shumica e pacientëve janë mbi 60 vjeç dhe janë infektuar brenda vendit, kryesisht nga Shkupi dhe një nga Sveti Nikolla.