Policia e Kosovës ka intensifikuar kontrollet në rrugën Gjakovë-Klinë në kuadër të planit operativ “Vera 2026”, duke kapur katër shoferë që vozitën me shpejtësi shumë mbi kufizimin prej 60 km/h. Dy prej tyre u kapën duke lëvizur me 188 dhe 162 km/h, ndërsa dy të tjerë me 135 dhe 123 km/h. Për shkelësit më të rrezikshëm janë shqiptuar gjoba prej 500 eurosh, pesë pikë negative dhe ndalim i drejtimit për gjashtë muaj, ndërsa për dy të tjerët gjoba prej 300 eurosh, tri pikë negative dhe ndalim për tre muaj. Policia ka bërë thirrje të vazhdueshme për respektimin e kufizimeve të shpejtësisë, duke paralajmëruar se shpejtësia e lartë paraqet një rrezik serioz për sigurinë e të gjithë pjesëmarrësve në trafik.