Gjykata Themelore në Prishtinë ka caktuar masën e paraburgimit prej një muaji për katër të dyshuarit me inicialet A.H., H.A., A.G. dhe T.A., të akuzuar për veprën penale të rrëmbimit në bashkëkryerje, si dhe për lëndim të lehtë trupor, mbajtje pa autorizim të armëve dhe posedim të paautorizuar të narkotikëve. Vendimi u mor pas një seance dëgjimore, ku u vlerësua se ekziston rreziku real që të pandehurit, nëse lirohen, mund të arratisen për të shmangur përgjegjësinë penale dhe të pengojnë rrjedhën normale të procedurës. Gjykata gjithashtu theksoi se të njëjtit janë përsëritës të veprave penale dhe mund të kryejnë përsëri shkelje, duke justifikuar kështu masën e paraburgimit. Palët e pakënaqura kanë të drejtë të ankohen në Gjykatën e Apelit përmes Gjykatës Themelore në Prishtinë.