Prodhuesi i njohur Ferrero ka tërhequr nga tregu në Gjermani një seri të kekëve me Nutella, pasi ekziston dyshimi se ato përmbajnë fragmente metalike që mund të shkaktojnë lëndime ose rrezik mbytjeje gjatë konsumimit. Tërheqja prek vetëm kekët e shitur në furrat e bukës brenda supermarketeve dhe hipermarketeve gjatë periudhës 16–25 qershor 2026, ndërsa produktet e tjera të Nutella-s dhe seritë tjera nuk janë të prekura. Konsumatorët paralajmërohen të mos konsumojnë këto kekë, pasi nuk mund të dallojnë lehtësisht serinë e prekur për shkak të mungesës së paketimit origjinal. Shitësit kanë hequr menjëherë produktet nga raftet, ndërsa klientët mund t’i kthejnë dhe të marrin rimbursimin përkatës, ndërsa Ferrero ka vënë në dispozicion një shërbim kujdesi për konsumatorët për çdo pyetje.