Forumi për Ndryshim në Arsim ka bërë me dije se stafi dhe platformat e tyre janë sulmuar dhe kërcënuar pas publikimit të dëshmive për një avancim të kundërligjshëm në Universitetin e Tetovës. Në qendër të denoncimit është avancimi i Arbresha Bexheti Feratit, bashkëshortes së kryetarit të Senatit të universitetit, Kenan Ferati. Drejtori i Forumit, Blendi Hodai, është kërcënuar përmes profileve fallco dhe mesazheve fyese janë dërguar edhe familjarëve të tij. Rasti është denoncuar në polici dhe po merren masa për zbardhjen e tij, ndërsa Forumi thekson se kërcënimet nuk do t’i ndalojnë në luftën kundër krimit akademik.