Policia e Kosovës ka bërë thirrje publike për të rritur vetëdijen lidhur me publikimin dhe shpërndarjen e fotove apo incizimeve intime pa pëlqimin e personit, duke theksuar se kjo është një vepër penale. Në mesazhin e saj, Policia paralajmëron qytetarët për kërcënimet që përfshijnë fraza si “I kam videot dhe fotot tua” ose “Ke vetëm 24 orë për të vendosur”, të cilat janë forma të shantazhit dhe presionit të paligjshëm. Autoritetet bëjnë thirrje që viktimat të mos heshtin dhe të raportojnë menjëherë këto raste përmes numrit 192, adresës elektronike apo aplikacionit “Lajmëro Policinë”. Ky apel synon të mbrojë qytetarët nga pasojat e kërcënimeve dhe të ndihmojë në ndëshkimin e autorëve të këtyre veprave penale.