Policia e Kosovës ka nisur hetime intensive lidhur me kërcënimet me eliminim fizik ndaj kryeministrit në detyrë, Albin Kurti, të publikuara në rrjetet sociale nga profili “Severna Brigada” ose “Brigada e Veriut”, organizatë e shpallur terroriste nga institucionet e Kosovës. Hetimet kanë zbuluar se kërcënimi është bërë nga territori i Serbisë, konkretisht nga qyteti i Kraljevës, ku janë identifikuar IP-adresa dhe të dhënat personale të përdorura gjatë regjistrimit të llogarisë në Facebook. Në koordinim me Prokurorinë Speciale dhe me mbështetjen e Drejtorisë për Hetimin e Krimeve Kibernetike, Policia ka siguruar edhe të dhëna shtesë që mund të ndihmojnë në vijimin e hetimeve intensive. Autoritetet theksojnë rëndësinë e këtij rasti, duke e konsideruar kërcënimin si pjesë të veprimeve të organizatës terroriste serbe, ndërsa hetimet vazhdojnë për zbardhjen e plotë të ngjarjes.