Prokuroria Speciale e Republikës së Kosovës ka kërkuar paraburgim ndaj A.D., ish-polic i Ministrisë së Punëve të Brendshme të Serbisë (MUP) në Ferizaj, i dyshuar për kryerjen e krimeve të luftës në vitin 1999 në fshatin Ivajë dhe rrethinat e Kaçanikut. Ai akuzohet se në bashkëkryerje me persona të tjerë nga forcat policore dhe ushtarake serbe, ka organizuar një aksion kundër popullsisë civile shqiptare, gjatë të cilit banorët u detyruan të largohen nga shtëpitë e tyre, të cilat më pas u dogjën dhe u shkatërruan. Gjatë këtij aksioni, 91 meshkuj u ndanë nga rreth 400 burra, gra, pleq dhe fëmijë, dhe u dërguan në stacionin policor në Kaçanik, ku 13 civilë u ndaluan për marrje në pyetje dhe u rrahën e torturuan në mënyrë brutale, çnjerëzore dhe psikike nga i pandehuri, duke iu shkaktuar lëndime të rënda trupore. Gjatë arrestimit të A.D. janë sekuestruar armë, karikatorë, fishekë, një armë gjuetie dhe një uniformë e MUP-it serb, ndërsa kërkesa për paraburgim synon të sigurojë pjesëmarrjen e tij në procedurat gjyqësore dhe të mbrojë integritetin e hetimeve për këto krime.