Këshilli Gjyqësor i Kosovës ka dënuar ashpër gjuhën linçuese dhe sulmet denigruese ndaj gjyqtares Edita Çanta, të cilat u bënë nga Milaim Zeka përmes rrjetit social Facebook pas një vendimi gjyqësor. KGJK e ka cilësuar këtë sjellje si sulm të drejtpërdrejtë ndaj integritetit personal dhe profesional të gjyqtares, duke e konsideruar atë një përpjekje për linçim publik dhe presion ndaj pavarësisë së gjyqësorit. Këshilli thekson se gjuha e urrejtjes dhe ofendimet ndaj gjyqtarëve janë të papranueshme dhe dëmtojnë rëndë sistemin e drejtësisë dhe sundimin e ligjit në Kosovë. KGJK shpreh mbështetjen e plotë për gjyqtarët dhe kërkon nga organet kompetente që të ndërmarrin veprimet ligjore për të garantuar sigurinë dhe pavarësinë e tyre në ushtrimin e detyrës.