Policia e Ekuadorit ka sekuestruar 469 kilogramë kokainë të fshehur në një kamion pranë kufirit me Kolumbinë, ku paketimet e drogës mbanin imazhin e yllit norvegjez të futbollit, Erling Haaland. Në automjet u gjetën 370 pako të fshehura në një ndarje të rreme, ndërsa drejtuesja e kamionit, një grua me dokumente kolumbiane, u arrestua. Vlera e drogës në tregun evropian arrin në rreth 20 milionë euro, ndërsa autoritetet theksuan se shumica e kokainës që trafikohet përmes Ekuadorit vjen nga Kolumbia dhe Peruja. Përdorimi i imazheve të sportistëve të njohur në paketimin e drogës është një metodë e rrjeteve kriminale për identifikimin e ngarkesave, por nuk ka asnjë lidhje të Haalandit me këtë rast.