Komuna e Vitisë ka formuar një Komision për Vlerësimin e Dëmeve të shkaktuara nga stuhia e fundit, i cili do të dalë në terren për të evidentuar dëmet në shtëpi, biznese, prodhime bujqësore dhe prona të tjera të prekura nga kushtet atmosferike të rënda. Ky komision është aktivizuar me vendim të kryetarit të komunës dhe do të veprojë në mënyrë profesionale, transparente dhe efikase për të ndihmuar në përballimin e pasojave të fatkeqësisë natyrore. Qytetarët, ekonomitë familjare dhe subjektet e tjera që kanë pësuar dëme janë ftuar të raportojnë rastet e tyre sa më shpejt për të mundësuar vlerësimin e duhur nga ekipet përgjegjëse. Për informacione dhe raportime, banorët mund të kontaktojnë anëtarët e komisionit, ndërsa Komuna premton ndërmarrjen e hapave institucionalë për të adresuar situatën.