Komuna e Drenasit ka njoftuar qytetarët për një urdhëresë të re të Ministrisë së Mjedisit dhe Planifikimit Hapësinor, e cila synon menaxhimin urgjent të mbeturinave gjatë sezonës së verës. Urdhëresa ndalon grumbullimin e mbeturinave në vende që rrezikojnë shëndetin publik, si pranë institucioneve edukative, parqeve, rrugëve kryesore dhe bizneseve ushqimore. Autoritetet janë të detyruara të ndërmarrin masa për eliminimin e këtyre deponive ilegale dhe të vendosin sisteme të ndara për mbeturinat e bizneseve të gastronomisë dhe marketeve. Inspektorati Qendror dhe ai Komunal do të raportojnë brenda 7 ditëve për masat e marra, ndërsa masat ndëshkuese kanë filluar të zbatohen për shkelësit.