Agjencia e Ushqimit dhe Veterinarisë (AUV) ka konfirmuar rastin e parë të lisë së deleve dhe dhive në Kosovë, konkretisht në fshatin Sazli të Komunës së Ferizajt. Sëmundja virale shumë ngjitëse prek delet dhe dhitë dhe ka pasoja të mëdha ekonomike për fermerët, por nuk përbën rrezik për shëndetin e njerëzve. Për të parandaluar përhapjen e sëmundjes, AUV ka vendosur masa të rrepta, duke ndaluar lëvizjen dhe tregtimin e kafshëve në rajonin e Ferizajt dhe Gjilanit, si dhe izolimin e fermave të prekura. Autoritetet lokale dhe Policia e Kosovës janë angazhuar për mbikëqyrjen e zbatimit të këtyre masave, ndërsa AUV vazhdon me hetimet epidemiologjike dhe testimet laboratorike.