Dogana e Kosovës, në bashkëpunim me Policinë Kufitare, ka sekuestruar mbi 122 mijë euro dhe valutë të huaj në pikëkalimin kufitar Dheu i Bardhë, gjatë një kontrolli të një automjeti me targa të huaja që drejtohej nga një shtetas rumun me tre pasagjerë. Gjatë pyetjes standarde doganore, udhëtarët deklaruan se nuk posedonin mjete monetare për deklarim, pavarësisht pragut ligjor prej 10,000 euro për person. Kontrolli fillestar zbuloi një çantë dore me 32,500 euro të fshehura, ndërsa kontrolli i detajuar në vijën e dytë nxori në dritë edhe 90,100 euro të tjera të fshehura në hapësira të ndryshme të automjetit, si pjesa e akumulatorit dhe nën plastikën e gomës rezervë, si dhe 4,187 lei rumunë. Rasti është referuar për procedura hetimore të mëtejshme, ndërsa Dogana ka rikujtuar detyrimin ligjor për deklarimin e mjeteve monetare mbi 10,000 euro gjatë hyrjes në Kosovë.