Mbrëmjen e së enjtes në Shëngjin, pranë shëtitores së plazhit dhe zonës së lodrave, ka ndodhur një konflikt i dhunshëm ku një person ka mbetur i plagosur. I dëmtuari është goditur me tytën e një pistolete zhurmuese dhe është dërguar me urgjencë në Spitalin Rajonal të Lezhës, ku ndodhet jashtë rrezikut për jetën. Policia ka shoqëruar një person në lidhje me ngjarjen dhe ka sekuestruar armën sportive zhurmuese që dyshohet të jetë përdorur gjatë sherrit. Hetimet vijojnë nën drejtimin e Prokurorisë për të sqaruar plotësisht rrethanat dhe motivet e këtij konflikti në një zonë të frekuentuar nga pushuesit.