Në Gjykatën e Apelit u shqyrtuan ankesat lidhur me dënimin prej 25 vjetësh të Besnik Salihut për vrasjen në Dumnicë të Podujevës, ndërsa vëllai i tij, Ilaz Salihu, ishte liruar nga akuza për ndihmë në vrasje. Prokuroria kërkon rritjen e dënimit për Besnikun dhe dënimin e Ilazit për ndihmë në vrasje, ndërsa mbrojtja kërkon aktgjykim lirues ose rigjykim, duke pretenduar shkelje në procedurë dhe vërtetim të gabuar të fakteve. Pala e dëmtuar kërkon burgim të përjetshëm për Besnikun dhe dënim maksimal për Ilazin, duke mbështetur ankesat e Prokurorisë Themelore dhe Apelit. Në seancë, i akuzuari Besnik Salihu deklaroi se procesi ndaj tij dhe vëllait ishte i padrejtë dhe se nuk kishin lidhje me ngjarjen e rëndë.