Dioqeza Prizren–Prishtinë ka kundërshtuar vendimin e Policisë së Kosovës për të ndaluar ceremoninë e bekimit të gurthemelit të kishës së re në Zogaj të Vushtrrisë, duke e cilësuar atë jokushtetues dhe joligjor. Për të shmangur tensionet, ipeshkvi Imzot Dodë Gjergji ka kryer bekimin një ditë më parë, në vigjilje të festës së Shën Florit dhe Laurit, ndërsa ceremonia e pagëzimeve është zhvendosur në Katedralen “Shën Nënë Tereza” në Prishtinë. Dioqeza thekson se zhvendosja nuk përbën pajtim me vendimin e Policisë dhe do të vazhdojë të kërkojë respektimin e lirisë fetare dhe të së drejtës së pronës përmes rrugëve ligjore. Në reagim është bërë thirrje për qëndrueshmëri dhe dashuri, duke refuzuar përplasjet dhe urrejtjen, ndërsa besimtarët janë ftuar të marrin pjesë në ceremoninë në Prishtinë.